Inginku gapai tapi inda tedaya.

Bila ketani dalam keadaan sakit, maka perkara yang sering ketani ingat ialah mati, walhal mengingat mati atu hukumnya sunat. Bagiku, bila jasat ketani sakit yang menyebabkan ketani terpaksa berehat macam limpang-limpang, roh ketani akan menjadi sensetif. Bagiku, mungkin ia akan ada berhubung dengan roh orang yang sudah inda ada. Tapi hubungan atu indalah sekukuh mana, sekadar ibarat orang bertagur sapa saja. Atu bagi ku, kalau ku salah tolong luruskan. Dan jangan jua luan difikirkan pasal atu. Kalau kan mau pasti, cuba tanya arah orang yang arif.

Kebelakangan hari-hari ani, aku rasa jahat hujut(damam). Banyak masaku berehat saja. Kadang-kadang, balik keraja, aku tarus betangkumus kesajukkan. Sampai aku kana bagi MC oleh doktor. "Thank you doktor"...( kalau boleh panjang-panjang cuti atu samapi 4-5 hari - kata ku dalam hati). rupa-rupanya, la.... sehari ganya.

Dalam ku berehat masa ku limpang-limpang sambil mendengar mp3 dari mobilku atu, waktu atu, lagu Hazami kudangar - Mungkir Bahagia. Tiba-tiba tebayangan seorang insan menyapa dalam ingatanku. Dari detik atu, segala peristiwa sertamerta flashback. Dari saat aku kana bagitau oleh C Aji yang arwah sudah meninggal sampaitah saat C Alai selamat pindah rumah.

Seperkara yang membuatkan aku menitiskan air mata. "Alangkah bisainya bila Arwah menyempati pindah rumah. Dapat ia merasakan kebahagian atu" atu bisik hatiku. Tapi bila kufikir semula, Allah telah mentakdirkan arwah supaya inda menyempati rumah atu. Mesti ada hikmahnya.

Kucuba cari apa yang tersirat dari kejadian atu, rupanya terlalu besar hikmahnya. Seandainya arwah menyampati rumah atu, tentu barat lagi derita perasaan keluarganya. Bayangkan saja, di rumah baru, tentu terbayang dimana ia suka duduk, memang teringat dimana ia suka melimpang untuk menunggu jam keraja lapas ia makan. entah-entah, orang yang inda beriman akan cakap rumah atu membuang tuannya... na'uzubillah.

Ani sekurang-kurangnya C Alai dan keluarganya dapat membena penghidupan baru disana.

"sesungguhnya, tiada sempena baik dengan buruk,

buruk dengan burung hantu,

dan larilah kamu dari orang yang berpenyakit kusta,

sebagaimana kamu lari dari singa".

- antara makna ayat atau hadis yang pernah ku pelajari di sekolah.